Taliska qeybta guud ee booliska gobolka Banaadir, ayaa xalay soo bandhigay 23 ruux oo isugu jira wiilal iyo gabdho oo ku eedeysan inay ka dambeyeen falal isugu jira dilal iyo dhac, ay geysteen magaalada Muqdisho.
23 ruux oo midi ay tahay haweeney, ayaa ciidanka ammaanka waxa ay ku soo qabteen howlgal ay ka sameyeen qaar kamid ah degmooyinka gobolka Banaadir.
“Hay’adda ha amiga Gobalka Banaadir iyo Shacabka Caasimadda oo is kaashanaya ayaa soo qabtay eedeysanayaal gaaraya 23 eedeysane oo kukacay falal iskugujira Dil, Dhaawac, Dhac dadweyne iyo ka ganacsi maandooriye” ayaa lagu yiri qoraal kooban oo kasoo baxay Taliska qeybta guud ee Booliiska gobolka Banaadir.
Sidoo kale taliska ayaa qoraalka kasoo baxay lagu sheegay in 23-ka eedeysane sida ugu dhaqsiyaha badan lagu horgeeni doono maxkamada si loo marsiiyo sharciga waxa uu qabo.
Ugu dambeyn Taliska qeybta guud ee Booliska gobolka Banaadir, ayaa shacabka Muqdisho, ugu baaqay inay laamaha amniga la soo wadagaan dadka geysnaya falalka amni darrada ah.