War kasoo baxay Taliska Booliska Soomaaliya ayaa lagu sheegay in ciidanka ammaanka ay howlgal ay sameyeen ku guuleysteen inay ku soo qabtaan gaari lagu soo raray walxaha qarax oo ku soo jeeday magaalada Muqdisho.
Gaariga ay ciidanka soo qabteen oo ahaa Toyoto Probox, ayaa waxaa saarnaa Sameecad weyn iyo Caagag laga soo buuxiyay walxaha qarxa, loona soo waday Muqdisho, balse baaris ay sameyeen ciidanka ammaanka ay ka salgareen waxlaha qaraxa ee gaariga saarnaa.
“Walxahan Qarxa ayaa dhagar qabayaashu ku soo farsameeyeen sameecadaha cod baahiyaasha ah , waxaana ay ku talagaleen in si farsameysan Ciidamada ku dhaafiyaan balse waa ay u suurageli waysay maadaama Ciidamadu u diyaarsan yihiin ka hortagga farsamooyinka cusub ay adeegsanayaan Khawaariijtu marwalbo” ayaa lagu yiri qoraalka kasoo baxay Booliska Soomaaliya.
Sidoo kale Taiska Booliska Soomaaliya, ayaa sheegay in Ciidanka Boliiska qeybtooda Xirfadlayaasha ah ay ku guuleystay burburinta walxaha qarxa ee laga soo buuxiyay.
Sikastaba, hay’adaha ammaanka ayaa muddooyinkii dambe xoojiyay howlgallada sare loogu qaadayo amniga Caasimada, iyaga oona ka hortagay qaraxyo ay damacsanayeen kooxda Al-shabaab, inay ka fuliyaan magaalada Muqdisho.