Warar dheeraad ah ayaa kasoo baxaya howlgal qorsheysan oo ciidanka Kumaandooska Danab ee xoogga dalka ay ka fuliyeen sacaadihii lasoo dhaafay deegaanka Masaajid Cali Gaduud ee gobolka Shabeellaha Dhexe, halkaasi oo ay ku sugan yihiin Al-shabaab.
Howlgalka ayaa la sheegay inuu iugu jiray mid weerar dhulka ah iyo duqeyn cirka ah oo si wadajir ah u fuliyeen ciidanka dowladda iyo saaxiibada Caalamka.
Saraakiisha ciidanka ayaa sheegay inta uu howlgalka socday in ay ku dileen 15 xubnood oo katirsan Al-shabaab, ayna ku burburiyeen saddex gaari oo labo ay ahayeen gaadiid dagaal mid kalana uu ahaa Ambalaas u adeegsanayeen qaab military.
Saraakiisha ayaa xaqiijiyay in xubnaha howlgalka lagu dilay uu kamid yahay Bashiir Axmed Dhuxul (Bashiir Caadle) oo ahaa madaxii Dacwada Al-shabaab ee gobolka Shabeellaha Dhexe.
Sikastaba, Taliska ciidanka xoogga ayaa horay u sheegay in howlgallada ka socda deegaanada Hir-shabeelle ay yihiin kuwa lagu doonayo in lagu ciribtiro Shabaabka ku sugan gobollada Shabeellaha Dhexe iyo Hiiraan.