Wararka ka imaanaya xaafada Soonakey ee degmada Hodan ee gobolka Banaadir, ayaa sheegaya in maanta dab dhaliyay khasaaro hantiyadeed uu ka kacay goobo ganacsi oo ku yaalla degmadaasi.
Goob joogayaal kamid ah dadka deegaanka, ayaa inoo sheegay in dabka markii hore uu ka biloowday koronto, kaddibna uu ku fiday goobaha ganacsi oo intooda badan dabka uu sameeyay.
Gawaarida dab damiska oo goobta gaaray ayaa ku guuleystay daminta dabka si uusan ugu sii fidin guriyaha ka agdhaw halka uu dabka kacay, mana jirto wax khasaaro nafeed uu dabka sababay.
Ciidamo katirsan dowladda oo goobta gaaray ayaa xakameeyay dadka shacabka ah, maadama xiliyadas ay rag tuugo ah ay dadka isku dhex qariyaan si ay u qataan alaabaha goobaha ganacsiga laga badbaadiyay.
Weli maamulka degmada Hodan kama uusan hadlin dabkan khasaaraha dhaliyay ee maanta ka kacay goobo ganacsi oo ku yaalla xaafada Soonakey ee degmada Hodan ee gobolka Banaadir.
Muqdisho waxaa inta badan la sheegaya in waxa yaabaha sababa dabka in ay koronta kow ka tahay, maadama ay Fiilooyinka korontada aan si haboneyn loo hagaajin taasi oo sababta in dab uu ka dhasho.