Faah faahino dheeraad ah ayaa kasoo baxeysa qarax miino oo haleeyay gaari Noah oo ay saarnayeen dad shacab ah, isla markaana ka yimid degmada Mahadaay ee Gobolka Shabellaha Dhexe, kuna sii jeeday garoonka diyaaradaha ee Maxamed Dheere, ee magaalada Jowhar ee xarnta maamulka Hir-shabeelle.
Goob jogayaal ayaa inoo sheegay in gaari ay wateen Dhalinyaro ka shaqeyneysay Garoonka Diyaaradaha Maxamed Dheere, ee magaalada Jowhar.
Inta la xaqiijiyay hal ayaa geeriyooday Sideed kalana waa aay ku dhaawacantay qaraxaasi Miinada ah ee gaariga qabsaday, waxaan dadkii ku dhaawacmay qaraxa la dhigay isbitalka magaalada Jowhar, si loo tacaalo.
Sidoo kale muqaal laga duubay gaariga ay miinada qabsatay ayaa muujinayay in gaariga uu soo gaaray burbur xoogan intiisa badan.
Wali laamaha amniga ee maamulka Hir-shabeelle, kama aysan hadlin khasaaraha uu dhaliyay qaraxan maanta ka dhacay wadada u dhaxeeysa Degmada Jowhar iyo garoonka diyaaradaha ee magaalada Jowhar ee xarunta Hir-shabeele.
Geesta kale dhalinyaradaan Shaqaalaha ka aheyd garoonka, ayaa la sheegay in inta badan ay si joogto wadadaas u isticmaali jireen, balse waxaa dhacday ugu dambeyn iney maanta la kulmeen musiibadan waxyeelada gaarsiisay.