Sida ay ilo wareedyo inoo shegeen Madaxweynaha Soomaaliya Xasan Sheekh Maxamuud, ayaa maanta la filaya inuu u dhoofo Dalka Turkiga,kaddib casumaad uu ka helay dhiggiisa dalkaasi Tukiga Erdogan.
Safarkan Madaxweyne oo aan xogo badan laga helin, ayaa imaanaya iyada oo khilaafka u dhaxeeya Itoobiya iyo Soomaaliya uu sii xumaanayo, isla markaana Dowladda Itoobiya ay Ciidamo badan soo dhoobtay xuduuda ay gobolka Gedo kala wadaagto Soomaaliya.
Wararka qaar ayaa sheegaya in Madaxweyne Xasan Sheekh kulamada uu la qaadanayo Madaxweyne Erdogan uu diirada ku saari doono, wadahadalo laga filayo in Magaalada Ankara, ay ku yeshaan Madaxweyne Xasan Sheekh iyo Ra’iisul wasaaraha Itoobiya Abiy Axmed.
Waxaana kulanka ka gadaal ka riixaya Turkiga oo doonaya in xal waara laga gaaro khilaafka sii xumaanaya ee u dhaxeeya Soomaaliya iyo Itoobiya, kaasi oo markii hore ka biloowday heshiiskii Badda ee bishii Janaayo Addis Ababa ku gareen Muuse Biixi iyo Abiy Axmed,
Dhinaca kale Madaxweyne Xasan Sheekh ayaa horay u diiday inuu la kulmo Abiy Axmed ilaa iyo inta uu ka laabanayo heshiiskii Badda ee uu la galay Soomaaliland, balse kulanka Turkiga uu doonayo inuu isku keeno labada hoggaamiye ayaan la ogeyn inuu qabsoomi doono iyo in kale.
Sikastaba, Turkiga iyo Soomaaliya ayaa waxaa ka dhaxeeya xiriir qoto dheer, iyada oo Dowladda Turkiga ay hadda ka shaqeyneyso sidii Soomaaliya ay u soo saaran laheyd Shidaal.