Warar dheeraad ah ayaa kasoo baxaya howlgal ay ciidanka Daraawiishta Puntland, ay ka sameyeen deegaano ku yaalla buuraha Calmiskaad ee gobolka Bari ee Puntland.
Howlgalka ayaa la sheegay in deegaano hor leh laga saaray Khawaarijta Daacish ee ku dhuumaalaysanaysa buuraha Calmis-kaad ee gobolka Bari.
Howlgalka oo ahaa mid dhowr jiho ah oo ay qaadeen Daraawiishta Puntland ayay ku guulaysteen in ay Daacish ka saaraan aagga deegaanka Curaar oo ka mid ah saldhigyadii ugu muhiimsanaa ee argagaxisadu haysatay.
Ciidanka ayaa goobta ugu tagay gawaari iyo mootooyin ay ku habsadeen duqeymihii ugu dambeeyay ee laga fuliyay buuraha gobolka Bari, waxaana sawirrada laga soo qaaday ay muujinayaan in jabka xooggan lagu gaarsiiyay weerarkaasi kooxda Daacish.
Sikastaba, howlgalka ka socda Puntland ee lagu ciribtirayo kooxda Daacish, ayaa waxa uu socda in ka badan 3 bil iyada oo madaxda Puntland ay guulo weyn ka sheegteen in laga gaaray dagaalka ay kula jiraan kooxda Daacish.