Wasiiru-dawlaha Wasaaradda Arrimaha Dibadda xukuumadda Soomaaliya Cali Cumar Cali (Cali Balcad) oo safar shaqo ku jooga Mareykanka ayaa la kulmay Senator Ted Cruz oo safka hore uga jira siyaasiyiinta Mareykanka awoodda ku leh ee u ololeeya aqoonsiga Somaliland.
Wasiir Cali Balcad oo kulanka kaddib hadal soo saaray ayaa mahadnaq u jeediyay dowladda Mareykanka oo sida uu sheegay Soomaaliya ka taageerta la dagaallanka argagixisada.
Wasiiru-dawle Balcad oo aan sheegin in ay Senator Ted Cruz ka wadahadleen qadiyadda Somaliland ayaa sheegay in iskaashiga Soomaaliya iyo Mareykanku uu muhiim u yahay adkaynta aminga gobolka, marin-biyoodka gacanka cadmeed iyo guud ahaan la dagaallanka argixisada Geeska Afrika.
Kulanka ayaa la aaminsanyahay in uu daarranyahay doodda ka dhalatay difaaca qadiyadda aqoonsiga Somaliland ee si hoose iyo si muuqataba uga socota Aqalka Cad ee Mareykanka, taas oo uu horboodayo Senator Ted Cruz oo jaalle dhow la ah madaxweyne Trumpp.
ONKOD RADIO