Waxaa maanta dib loo furay goobihii ganacsiga ee suuqa weyn ee Bakaaraha ee magaalada Muqdisho, kaddib markii cabasho ay qabeen ganacsatada uu suuqa u xirnaa muddo Afar maalin ah.
Sababta keentay in dib loo furo suuqa ayaa timid, kaddib markii shalay ay kulan yeesheen guddiga ay ku mideeysan yihiin ganacsatada gobolka Banaadir, iyo ku-simaha madaxweyaha Ahna guddoomiyaha golaha shacabka ee Baarlamaanka Soomaaliya Sheekh Aadan Madoobe.
Xubnaha ganacsatada ee la kulmay Sheekh Aadan Madoobe, ayaa u sheegay sababta ugu weyn ee ay u joojiyeen ganacsiga suuqa ay tahay in dowladda mar walbo ku soo rogtay Canshuur xad dhaaf ah ayna u baahan yihiin in xal loo helo arrintaasi.
Geesta kale guddoomiye Sheekh Aadan Madoobe, ayaa ganacsatada faray in ay dib u furan goobahooda ganacsiga, isla markaana laga dul qaadi doono culeysyada caqabadaha ku noqday goobaha ganacsiga ee ku yaalla Muqdisho.
Ma ahan markii ugu horeeysay oo ganacsatada suuqa Bakaaraha ay xiraan goobahooda ganaciga, iyaga oo cabasho ka qaba Canshuurta ay dowladda ku soo rogto xiliyada qaar oo ganacsatada dhankooda cabasho ay ka keenaan.