Garoowe (ONKOD) Madaxwaynaha maamul goboleedka Puntland Saciid Cabdullaahi DENI ayaa sheegay in Guddiga doorashooyinka maamulkaas ay qabteen howl taariiqi ah oo la xasuusan doono.
Madaxwayne Saciid Deni ayaa sheegay in howl adag oo loo baahnaa ay qabteen Guddiga doorashada TPEC kuwaas oo ku guulaystay qabashada doorasho qof iyo cod ah oo ka dhacday deegaano ka mid ah Puntland.
“Xubnaha sare ee Guddiga iyo Hawlwadeenada TPEC ee Xarunta Dhexe waxaan ku bogaadinayaa shaqadii adkeyd ee aad soo qabateen oo aheyd Hawl Hufan oo shacabka Puntland iyo daneeyayaasha maxaliga ah iyo kuwa caalamiga ahba u riyaaqeen” ayuu yiri Deni
Hadalkan ayaa Madaxwaynaha Puntland Saciid Cabdullaahi Deni waxa uu sheegay mar uu booqasho uu ku tagay xarunta Guddiga doorashooyinka ee magaalada Garoowe.
Madaxweynaha waxa uu Guddiga iyo Hawlwadeenadaba u balanqaaday in Dowladdu ay sii wadi-doonto tayaynta iyo taagerida guddiga doorashoyinka.
Guddoomiyaha Guddiga Mudane Abdirsak Ahmed Said ayaa Madaxweynaha uga mahadceliyay booqashada, bogaadinta iyo mahadcelinta uu ugu yimi Guddiga.