Iran (Onkod Radio) — Dalka Iraan bikranimada guurka ka hor waxay muhiim u tahay gabdho badan iyo qoysaskooda.
Mararka qaar ragga gabdhaha dalkaasi Iiraan guursanaya waxay weydiiyaan shahaado bikranimadooda caddeyneysa.
Hay’adda Caafimaadka Adduunka ee WHO ayaa arrinkaa ku tilmaantay mid ka horimaneyso xuquuqda aadanaha.
Sanadihii la soo dhaafay dad badan oo ka soo horjeedo shuruuddaasi lagu xiro guurka gabdhaha dalka Iiraan ayaa u ololeynaya sidii loo joojin lahaa.
”Guurka waad igu khiyaantay maadaamaa aad bikra ahayn, haddii runta la ogaadana cidna kuma guursaneyso,” ayuu ku yiri seyga Maryam kaddib markii uu u galmooday habeenkii aqal galkooda.
Waxayna Maryam isku dayday iney seygeeda u xaqiijiso iney bikro tahay horayna wax galma ah ay u sameynin, walow uu dhiig ka imaanin markii ugu horreysay oo ay seygeeda kulmayeen.
Seygeedana ma aaminin wuxuuna weydiidyey iney tusto shahaado caddeyneyso iney bikro tahay.
Caadadan ayaa ah mid si weyn uga jirto dalka Iiraan.
Gabadha marka la soo doono ama nin la siiyo waxay u tageysaa dhakhtar si bikranimadeeda u baaro kaddibna uu u siiyo shahaado caddeyneysa iney bikro tahay.
Hase yeeshee, Hay’adda Caafimaadka Adduunka ee WHO waxay sheegtay baaritaanka bikranimada inuu cilmiga sayniska mudnaan siineyn.
Khubarada caafimaadkuna waxay sheegayaan bikranimadu iney isugu jirto mid xilliga galmada dhiig uu ka yimaaddo iyo mid aanba dhiig lahayn gebi ahaanba.
Khuburada ayaa sheegaya in haddii gabadha uusan dhiig ka imaan xilliga ugu horreeya oo loo galmoodo aysan ka dhigneyn ineysan bikro eheyn.
“Arrinta uu seygeyga igu sameeyey sharafteyda ayey dhaawacday. Wax khalad ahna maanan sameyn maadaama seygeyga si aad ah uu iigu xadgudubay waxaan qaatay dawo iga tan badan si aan isu dilo, balse markiiba isbitaal ayaa la iila cararay sidaa ayaanna ku badbaaday,” ayey tiri Maryam.
“Maalmihii xumaa ee nolosha iga soo maray weligey ma illaawayo. 20 kiilo ayaa miisaankeyga ka dhacday murug darteed,” ayey tiri.
Sheekada Maryam waa mid haysato gabdho badan oo ku nool dalka Iran.
Dumarka siyaabo kala duwan bikranimada ku waayey waxay galaan qalliin lagu soo celiyo bikranimada haweenka si ay u ilaaliyaan sharaftooda iyo sharafta qoyskooda, waxaana kaga baxa kharash aad u badan.
Waxaana haatan billaabmay dhaqdhaqaaqyo ay rag iyo dumarba ka qayb qaadanayaan oo lagu doonayo in arrinkaa wax laga baddalo.
“Waxay xadgudub ku tahay xorriyadda qofka, waana bahdil,” ayey tiri Neda oo ka mid ah dadka sida weyn arrinkaa uga soo horjeedo.
Waddamada kale uu dhaqanka noocan ah ka jiro waxaa ka mid ah dalalka Indonesia, Ciraaq iyo Turkiga.